Elurra mendian

Eguraldiarekin lotutako albisteek jendearen arreta pizten dute. Bero handia edota hotza egiten duenean are gehiago. Egunotan esaterako, gai horrekin lotutako berriek entzule edota irakurle ugari izan dute, elurra albiste bihurtu baita.

Jende ugarik du gustuko elurra, baina kotxea hartzeko unean edota lanera joaterakoan arazoak eragiten ditu, eta kalean ez egitea nahi izaten du herritar askok, batez ere helduek, haurrek aisiarekin lotzen baitute normalean.

Jan bila
Momentuz herriguneetatik desagertu da, baina mendian asko dago oraindik. Paisaia eta irudi ederrak ikus litezke bertan. Zuhaitzetako adar biluziak txurituta, artzainen txaboletako teilatuak estalita, ur putzuak izoztuta… Argazkiak egiteko leku ezin aproposagoak bihurtzen dira mendiak eta basoak. Askok aprobetxatu dituzte egun hauek horretarako. Dena ez da ederra, ordea, han ere, batez ere bertan bizi diren animalientzat. Elurretan oinatz ugari ikus litezke, jan bila hara eta hona ibiltzen direnaren seinale. Ez da erraza maindire zuriak bazter guztiak estaltzen dituenean ahora eramateko zerbait aurkitzea. Behorrek eta zaldiek, esaterako, elurraren gainetik irtetzen diren laharrekin konformatu behar izaten dute. Haiek, ordea, badute abantaila bat, beraien jabeek tarteka mendira joan eta jateko zerbait ematen baitie. Zailagoa izaten dute animalia basatiek elikagaiak aurkitzeko, eta askok gose apur bat ere igaro behar izaten dute sarritan. Beste batzuen kasuan naturak berak babesten ditu, negu gogorra bukatu bitartean lozorroan egoten baitira.

Behorra laharrak jaten

Dirudienez, oraindik elurra ikusteko aukera izango da. Gaur esaterako tarteka euria egingo du herrietan, baina 800-1000 metrotik gora elurretan botako du. Beraz, Goierriko basoek eta mendiek txuri-txuri jarraituko dute momentuz.

Etiketak: animaliak, behorra, ederrak, elurra, gogorra, mendian, paisaia